Tòrna Maggio

Ròse! Che bèlli rròse!...Tòrna maggio!

Sentite 'addóre 'e chisti sciure bèlle!

Sentite, cómme cantano l'auciélle...

e vuje durmite ancòra!?...

'I' che curaggio!

Aprite 'sta fenèsta, oje bèlla fata,

ché ll'aria mo s'è fatta 'mbarzamata:

Ma vuje durmite ancòra, 'i' che curaggio!

Ròse! Che bèlli rròse!...

Tòrna maggio!

Ròse che bèlli rròse!... 'A n'anno sano,

stóngo strujènno 'e pprète 'e chésta via!

Ma vuje nun v'affacciate...uh, mamma mia!

I' nun me fido 'e stá da vuje luntano...

E si ve stó' luntano quacche ghiuórno,

pare ca vuje me state sèmpe attuórno...

ca me parlate e mm'astrignite 'a mano...

Ròse! Che bèlli rròse!

È n'anno sano...

Rose! Che belli rrose! E vuje durmite!...

Ma nun ve scéta stu prufumo dóce?

'E primmavera nun sentite 'e vvóce?

Ma vuje, còre 'mpiétto, ne tenite?!

Vòcca addirósa cómm'a na viòla!

'A primmavèra mia site vuje sóla!

Ma chésta vòce vuje nun 'a sentite?

Ròse! Che bèlli rròse!

E vuje durmite!.

• Artist:Vincenzo Russo
• Album:ulitanata (2008)