Txora Pa Dentu lyrics

Oji zona manxi tristi, más um korpu sta na txon

Jovem dja matadu, pai di fidju na kaxon

Sa difisil di komprendi resta xinti situasom

Na meiu di txorus e lamentus, n obi komunikason, Edsom

Onti n komprimentau la na strada

E bu pása, dam ideia na palavra

Oji fladu ma bu korpu sta na strada, xeiu bala

Ma Deus ta tomau bu alma, Edsom

Tinha um mininu pikinoti

Era bunitu, bo ku kel bebe na kel dodoti

Na varanda di bu kasa ta kontrola panorama

Oji n odja disisperu na semblanti di bu dama

Tudu é mas difisil broda ó ki fomi txiga

Inda é mas difisil ó kê xefi di familia

Ma mi é ka Deus di serteza n tom ka podi julga

Pa tudu ki nhós prendi, foda pamó vida é puta

Kumunidadi sa ta txora

Vida é só um, kó dispertisa antis txiga hora

Ka sta tempo di xona

Kunfia na Dja ka bu ranja pistola

Bu tem ki fazi mó mi

Reza tudu dia pa alma di kes bu enemy

Sta komplikadu pa li

Ma tudu ta midjora, su kunfia na kel omi grandi

Oji zona manxi tristi, mas um jovem dja dispara

Dentu di sé kasa madrugada ta diskansa

Barudju bem di loja, sugundu bês kes bem asalta

Ntom ka podi vasila, abri banquinha panha arma

Vida sta mutu komplikadu

(Pó trabadja dia interu, pó intrega matxikadu)

Rapaz sta mutu abuzadu

(Pa difendi sé familia, Nildo fazi um disparu)

N ka konxeba el ma n obi fladu mé bom gaju

Imagina atrazu ki bu panha ku es asasinatu

Mas um kazu ki dja marka ruas di nha Ponta d'Agu

Nós vida é um storia ki pa sempri ta fika markadu

Tudu é mas difisil broda ó ki fomi txiga

Inda é mas difisil ó kê xefi di familia

Ma mi é ka Deus di serteza n tom ka podi julga

E tudu sta na món di kel omi la na altura

Kumunidadi sa ta txora

Vida é só um, kó dispertisa antis txiga hora

Ka sta tempo di xona

Kunfia na Dja ka bu ranja pistola

Bu tem ki fazi mó mi

Reza tudu dia pa alma di kes bu enemy

Sta komplikadu pa li

Ma tudu ta midjora su kunfia na kel omi grandi

Oji zona manxi tristi ma dós vida sta markadu

Markadu pa nigligensia ki distrosa kumunitáriu

Markadu pa inkompitensia ki stadu sta inxinanu

Familias inoperanti, dianti politika mal aplikadu

Polisia em abundansia logika di quantidadi

Oprimi li na guetto, forma mosa ku qualidadi

Kumpra karru piqueti, em vez di kria skolas d'arti

Pó sistema ta funsiona ku kes jovens traz di gradi

Ma ka tem vergonha broda di bendi pastel

Ma sta mas fásil bendi droga, juventudi dja sabel

E kompetividadi primeru kusa que nhós prega

Tudu alguem kre ser primeru na intxi bolso d papel

Tudu é mas difisil broda ó ki fomi txiga

Inda é mas difisil ó kê xefi di familia

Ma mi é ka Deus di serteza ntom ka podi julga

Nu kema karta William Lynch buli skravatura

Kumunidadi sa ta txora

Vida é só um, kó dispertisa antis txiga hora

Ka sta tempo di xona

Kunfia na Dja ka bu ranja pistola

Bu tem ki fazi mó mi

Reza tudu dia pa alma di kes bu enemy

Sta komplikadu pa li

Ma tudu ta midjora, su kunfia na kel omi grandi

(Es ta txora, es ta txora, es ta txora

Odja nós jovens di gueto, es sa ta txora pa dentu)

• Artist:Helio Batalha
• Album:Karta d'Alforia (2016)