Un sirventes novel lyrics

Un sirventes novel vueill comensar,

Que retrairai al jor del jujamén

A sel que-m fes e-m formet de nién.

S'el me cuja de ren arazonar

E s'el me vol metre en la diablía

Ieu li dirai: seinher, merce, non sía

Qu'el mal segle tormentiei totz mos ans.

E guardas mi, si-us plas, dels tormentans.

Tota sa cort farai meravillar

Cant auziran lo mieu plaideiamen;

Qu'eu dic qu'el fa ves los sieus faillimen

Si los cuja delir ni enfernar.

Car qui pert so que gazanhar poiría,

Per bon dreg a de viutat carestía,

Qu'el deu esser dous e multiplicans

De retener las armas trespassans.

Los díables degra dezeretar

Et agra mais d'armas e plus soven,

E-l dezeretz plagra a tota gen

Et el mezeis pogra s'o perdonar,

Car per mon grat trastotz los destruiría,

Pos tut sabem c'absolver s'en poiría:

Bels seinhers Dieus sias dezeretans

Dels enemix enuios e pezans

Vostra porta non degras ja vedar,

Que sans Peires i pren trop d'aunimen

Que n'es portiers: mas que intres rizen

Tota arma que lai volgues intrar.

Car nuilla cortz non er ja ben complía

Que l'uns en plor e que l'autre en ría;

E sitot ses sobeirans reis poissans,

Si no m'ubres, er vos en fatz demans.

Ieu no me vueill de vos dezesperar;

Anz ai en vos mon bon esperamen,

Que me vaillas a mon trespassamen:

Per que deves m'arma e mon cors salvar.

E farai vos una bella partía:

Que-m tornetz lai don moc lo premier día

O que-m siatz de mos tortz perdonans.

Qu'ieu no-ls fora si non fos natz enans.

S'ieu ai sai mal et en enfern l'avía,

Segon ma fe tortz e peccatz sería,

Qu'ieu vos puesc ben esser recastenans

Que per un ben ai de mal mil aitans.

Per merce-us prec, donna sancta María,

C'al vostre fill mi fassas garentía,

Si qu'el prenda lo paire e-ls enfans

E-ls meta lay on esta sans Johans.

• Artist:Al Andaluz Project