VIII, LIBER PRIMUS lyrics

Lydia, dic, per omnis

te deos oro, Sybarin cur properes amando

perdere, cur apricum

oderit Campum, patiens pulveris atque solis,

cur neque militaris 5

inter aequalis equitet, Gallica nec lupatis

temperet ora frenis.

Cur timet flavum Tiberim tangere? Cur olivum

sanguine viperino

cautius vitat neque iam livida gestat armis 10

bracchia, saepe disco

saepe trans finem iaculo nobilis expedito?

quid latet, ut marinae

filium dicunt Thetidis sub lacrimosa Troia

funera, ne virilis 15

cultus in caedem et Lycias proriperet catervas?

• Artist:Quintus Horatius Flaccus