Weder ist ez übel oder guot lyrics

1.

Weder ist ez übel oder guot

daz ich mîn leit verhelen kann?

man siht mich dicke wol gemuot,

so trûret manig ander man,

der mînen schaden halben nie gewan.

so gebâre ich dem gelîche,

als ich sî maniger fröiden rîche.

nû muoz ez got gefüegen sô,

daz ich von wâren schulden müeze werden frô.

2.

Wie kumet, daz ich sô manigem man

von sîner nôt geholfen hân,

sît ich mich selben niht enkan

getrœsten, mich entriege ein wân?

ich minne ein wîb, diu ist guot und wol getân,

diu lât mich aller rede beginnen,

ich kan aber endes niht gewinnen.

dar umbe wære ich nû verzaget,

wan daz si ein wênig lachet sô si mir versaget.

3.

Si sehe, daz si innen sich bewar

- si schînet ûzen fröidenrîch -,

daz si an den siten iht irre var,

sô wart nie wîp sô minneclîch,

sô tuot ir lop vil frouwen lobes entwich.

ist si nâch ir wirde gefurrieret,

die schœne, die si ûzen zieret:

kann ich ir denne gedienen iht,

des wirt bî solchen êren ungelônet niht.

4.

Swie noch mîn fröide an zwîvel stât,

den mir diu guote mag vil wol

gebüezen, ob sis willen hât,

sôn ruoche eht, waz ich kumbers dol.

si fraget des mich nieman fragen sol,

wie lange ich welle bî ir belîben:

si ist mir iemer vor allen wîben ein

wernder trôst ze fröiden mir. nû

müeze mir geschehen alz, daz ich gloube an ir.

5.

Genuoge kunnen deste baz

gereden daz si bî liebe sint.

swie dicke ich ir noch bî gesaz,

sô wesse ich minner danne ein kint:

ich wart an allen mînen sinnen blint,

des wære ich anderswâ betœret.

si ist ein wîb diu niht gehœret,

und guoten willen kann gesehen.

den hân ich, sô mir iemer müeze liep geschehen.

• Artist:Walther von der Vogelweide