Ma che dulore! [Italian translation]

State a ssentì, ve vòglio dì na còsa,

ma nun m'aita chiammà po' scustumato;

chéllo ca v'aggia dì è na quaccòsa

ca i' pènzo che vuje ggià nn'ite parlato.

Sta cusarèlla è ccòsa ca sta a cuóre

a tutte quante nuje napulitane:

sentènnela 'e struppià, ma che dulóre,

p'arraggia 'e vvòte me magnasse 'e mmane!

Ma nun è pròprio chisto l'argomènto,

si 'a 'nguaiano o no ‘a pòvera canzóne...

Sanno parlà sultanto 'e tradimènto!

'A verità, stu fatto m'indispóne.

Na vòta se cantava " '0 sóle mio ",

"Pusìlleco... Surriénto... Marechiaro",

" Ô Vómmero nce stà na tratturia "...

"A ppurpe vanno a ppesca cu 'e llampare"...

Chélli paròle 'e sti canzóne antiche,

mettévano int' 'o còre n'allerézza;

chésti pparòle 'e mo?... Che ffà... V' ô ddico?

Nun è pe criticà: sò na schifézza!

"Tòrna cu mme... nun 'mpòrta chi t'ha avuta"

" '0 ssaccio ca tu ggià staje 'mbraccio a n'ato"...

"Stóngo chiagnènno 'a che te ne si’ gghiuta"...

"Che pòzzo fà s'io sóngo 'nnammurato"...

Mettìmmece na pèzza, amici cari,

e nun cantammo cchiù: "Tu m'hê traduto".

Sentènno sti ccanzòne, a mme me pare

'e sta' a sentì 'o lamiénto d'e curnute!

• Artist:Totò