La filosofia del cornuto [Italian translation]

Ognuno ‘e nuje nasce cu nu destino:

a malasciòrta, ê vvòte, va… po’ tòrna;

chi nasce c‘o scartiéllo arèto ‘e rine,

chi nasce c‘o destino ‘e purtà ‘e ccòrna.

Io, per esempio, nun me métto scuórno:

che nc’aggi’a fà si tarde ll’aggio appréso?

Penzavo: sì, aggio avuto quacche cuórno,

ma no a tal punto de sentirme offéso.

È stato ajére ô juómo: ‘a chiromante,

liggennòme cu ‘a lènte ‘mmiéz‘a mano,

m’ha ditto: “Siete stato un triste amante,

vedete questa linea cómme è strana?

Questa se chiamma linea del cuore,

arriva mmiéz'ô palmo e po’ ritorna.

Che v’aggia dì, carissimo signore;

cu chésta linea vuje tenite ‘e ccòrna.

Guardate st’atu ségno fatt’a uncino,

stu ségno, ormai da tutti è risaputo,

‘o pòrta ‘mmiéz'â mano San Martino,

ch’è o Santo prutettóre d‘e cumute”.

Sentènno sti pparòle ‘ int’o cerviéllo

accumminciaje a ffà mille penziére.

Mo vaco â casa, faccio nu maciéllo,

pe Ddio, aggia fà córrere ‘e pumpiére.

“Ma no… Chi t’‘o ffa fà?” (na voce intèrna

mme suggerètte). “ Lèva ll’occasióne.

‘E ccòrna ormai sóngo na còsa etèrna,

nun c’è che ffà, è ‘a sòlita canzóne.

‘O stéss’ Adamo stéva ‘mparaviso,

eppure donna Eva l’ha traduto.

‘ncòpp'a sti ccòrna fatte nu surriso,

ca pure Napulióne era curnuto!”.

• Artist:Totò