Gêrhart Atze [German translation]

Mir hât hêr Gêrhart Atze ein pfert

erschozzen zÎsenache.

daz klage ich dem, den er bestât:

derst unser beider voget.

Ez was wol drîer marke wert.

nû hoeret frömde sache,

sît daz ez an ein gelten gât,

wâ mit er mich nû zoget:

Er seit von grôzer swaere,

wie mîn pferit maere

dem rosse sippe waere,

daz im den vinger abe

gebizzen hât ze schanden.

ich swer mit beiden handen,

daz si sich niht erkanden. –

ist ieman der mir stabe?

Swâ guoter hande wurzen sint

in einem grüenen garten

bekliben, die sol ein wîser man

niht lâzen unbehuot.

Er sol si schirmen als ein kint,

mit ougenweide in zarten:

dâ lît gelust des herzen an

und gît ouch hôhen muot.

Sî boese unkrût dar under,

daz breche er ûz besunder

(lât erz, daz ist ein wunder)

und merke, ob sich ein dorn

mit kündekeit dar breite,

daz er den furder leite

von sîner arebeite –

sist anders gar verlorn.

Uns irret einer hande diet:

der uns die furder taete,

sô möhte ein wol gezogener man

ze hove haben die stat.

Die lâzent sîn ze spruche niet –

ir drüzzel derst sô draete,

kunde er, swaz ieman guotes kan,

daz hulfe niht ein blat.

"Ich und ein ander tôre,

wir doenen in sîn ôre,

daz nie kein münch ze kôre

sô sêre mê geschrei." –

Gefüeges mannes doenen

daz sol man wol beschoenen,

des ungefüegen hoenen –

hie gêt diu rede enzwei.

• Artist:Walther von der Vogelweide